February 21st, 2022

 






​


​Rüggbligg uf d'Fasnacht 2022
​...oder dr Värsli-Brünzler


Pst, pst! Mir froge, sit dr würkli alli do?                                       
Jo, das mir do vorne scho vernoh      
de föh mr halt jetz grad a                                        
Helm auf, jetz gömer mr dra                                  
 
Wenn d’Glogge lüte, setsch z’Chile goh                                                                         
Jo, das isch halt z’Breitebach eso                                                                     
Aber mi? Mi haut das us de Sogge
Ig wott nid ständig uf der Strofbank hocke
 
S’Ricola Täfeli isch guet grote                                                 
Jetz wot’s no dr Mohrechopf hürote
Wär het das jetz wieder erfunde
Dies Mol chunnts denn bald vo Grällige unde
 
Dr Kampf isch scho i dr drissigschte Runde                          
Und no immer ligt kaine uf de Brätter unde
Dr Adam buschteret sich so dure
Und dr Covid git em gäng no eis uf d’Schnure
 
Odermättli, Odermättli
Schiess no e Göli unters Lättli
So eine wie dr Karli gitts nie meh
Jetz gwünnt dä Olidie no uf Schnee                                           
  
Dr  Tschowanni sait zum Pepone
Dr Don Camillo het die gärn oben ohne
Nai, dä wott keini alte, lädrige Tante
Dä het lieber jungi, zarti Minischtrante
 
Si hei alli ihri Giige verrbrennt                                                   
Für eine wo unter de Brügge pennt
Jetz bruuche sie Stütz für holzigi  Instrumänt
Und so verbroote sie ihr Spändegäld
 
D Gerda vo Thun am Bärg                                                       
Dä chli und giftig Öko-Zwärg
Griegt nümme si vili Orde
Si isch halt jetz erwachse worde
 
D’Basler hei kei früschi Luft erläbt
Drum sin si is Laufedal und in Thierstai gschträbt
Und das, was mir jetz säge. Das chönnet dir notiere
Mir tüen sicher nit no dr Morgestraich kopiere
 
E rächti Eh isch für Ma und Frau                                             
E Schwule und e Lesbe, das goht au
Und e Eh vo zwöi Schwule oder zwöi Leschbe?
 Dä Fall muess dr Bundesrot zersch teste.
  
Dino, Du hesch so es männlichs Gsicht                                 
Du bisch dr Typ Vergissmeinnicht
Öppe eso, wie der Altpresidänt von USA
Sit här luegt mi dr Dino nümme a
 
My Härz spinnt, ig bi as Telefon g’hetzt                                
Aber im Notfall sin alli Leitige b’setzt
S’Bändli sait: Mir lüte a bis hüte Zobe
Jä, das gsehn i jetz vom Himmel obe
       
Ig putz grad, was i öppe so geseh
Und mi Ma macht d’Rächnige vo dr ’BLKB                            
Är het e grün-schwarze Locher
Und ig gottlob kei rächte Blocher
 
Dr David Däge het der FCB übernoh
Und denn si alli is Schleudere cho
Är füehrt der Verein, ig mach e Wett
Grad eso wie er früehner gschutte het
 
Schloss Hägwerds isch neu vo Corona befalle                      
Das het dr Rooling gar nit g’falle
Si schiggt dr Härry und Wessli uf Laufe
Döt sig schiins no e Schpital z’verkaufe 
                                          
Das wär’s für hüt, bis bald. 

---