15. Mai 2024

​





s Alter 3...
 
 
Z’erwähne wär do a däre Stell
Als erschte Punkt s Finanziell.
S chunnt d’Ränte, chasch die druf verloh
Scho afangs Monet, einfach so.
De muesch drfür kei Bei meh lüpfe
Fasch gar bi Nacht zum Bett us hüpfe.
Es rasslet jetz kai Wecker meh.
Die Site muess me halt au gseh.
Bim Gipfeli und Weggli ässe
Chasch scho bim Zmorge alls vergässe,
was d Bude, Büro, Büetz betrifft.
An gröschte Boss, an chlinschte Stift,
an alle muesch jetz nüm dänke,
will anderi dr Chare länke.
Schpaziere chasch am Wärchtig scho
Und ohni Sorge frisch und froh
Go lädele, dr Ma goh schiesse.
Jetz darfsch ganz eifach s Läbe gniesse.
Und eis isch au no wichtig z’wüsse.
Jetz chasch all Dag mit guetem Gwüsse,
grad wenn d so Gluscht hescheine z’bisse,
e Dröpfli Rote oder Wisse
in aller Stilli zu dr neh.
Es rüefe keini Pflichte meh.
Läb so in Gmüetlichkeit und Rueh,
schtosch fröhlich uf und nimmsch drzue
no jede Dag, grad wiener chunnt.
Mängmol schwarz-wiss und mängmol bunt
Und chunnsch au suscht no zimmli drus,
und hesch dr Friede no im Hus,
cha grad die Zyt, do blibts derbi,
dr schönschti Teil vom Läbe si.

---