December 27th, 2022

​
​Aber, aber

Ig ha mi immer für dr Heimatschutz, für dr Erhalt vo alte Bausubstanze ygestzt. O grad eso, wo si z Gringel hei wölle s alte Chäppeli am Wahlewäg abrisse. Das majestätischi uralti Chäppeli isch de vierzäh Nothälfer gweiht gsi. S het dinne o ä ganz ä alte Opferstogg us Holz gha, wo mit schmiedisige Bänder armiert gsi isch. Jetz aber het öpper vo Gringel wölle dr Himmel chaufe und het äs Legat vo einige tuusig Frangge für ä neui Kapälle gstiftet. S isch ebe grad rächt gsi, as me het wölle dä Wahlewäg zunere Stross usbaue. Eso het me chönne säge, das Chäppeli syg im Wäg und s müess ewäg. S het o no ä anger Argumänt gäh, nämlich; äs syge dört inne emol so pupertierindi jungi Bursche und Maitli z Nacht uf falschi Gedangge cho. Item; Wenn me hät wölle, aber ebe, me het nit, so hät me uf dr Bärg-Syte halt müesse öppis Felsmaterial ewäg chratze. Jo, und als Heimatschützer ha’ni denn wäge dem Kulturfräfel i dr Zytig ä Läserbrief gschribe. Das het aber dr Pfarrer Fluri denn extrem gergeret.

Dr Pfarrer Fluri isch vo Mazendorf cho und z Gringel Dorfpfarrer gsi. Är het mi denn emol z Breitebach uf dr Post drwäge so richtig zäme gschtuucht. Das gech mi überhaupt nüt a – und ig söll mi gfälligscht nit i ihri Aglägeheite ymische, het’er verergert vo sich gäh. S isch denn eso usecho wie dr Stellverträter Gottes het wölle. Me het s alte abgrisse und wyter obe ä neui baut. Die isch sicher o schön und dr Sverin Borer het drfür o ä schöns Bild gmoolt.

Aber isch das ä Rächtfertigung? Wenn imene skrupellose Ma syni Frau älter worde isch und denn dä ä jungs Düpfi hei bringt, so seit o niemer, die syg jetz halt vill schöner, as die ehemaligi, oder nit?
 
Die Gschicht isch’mr grad i Sinn cho, wo’ni im chlyne Car vom Mario Steiner nach Giswil ungerwägs gsi bi, um zäme mit de Schuelkollege vo mym Göttibueb, em Benno Huber, ha wmüesse Abschiid näh. Är isch hinterhältig im Alter vo erscht 48 Johr vom Chräbs besiegt worde:
 
Im Auti verzellt eine vo früecher, vomene Schuelerläbniss mit em Pfarrer F. - spöter bym Lycheässe ha’ni dä ehemalig Bueb, wo i däm bsungere Ereignis d Hauptrolle gspiilt het grad sälber chönne lo verzelle und die wo drum-umme gsässe si hei’nen brav ergänzt.

Also das syg eso gsi: Dr Pfarrer F. heb mit syne Primarschüler Religionsunterricht gha. Dene Chinge syg dä Unterricht aber troche und langwylig vor cho und eso heb denn dr K. insgeheim afo Grimasse und Faxe mache. Dummerwys syg aber hinger’em K., a dr Wang, ä Spiegel ghange und eso heb dr Pfarrer F. das indiräkt chönne  beobachte.

Stins-verruggt syg’er vo hinge uf dä Bueb los und heb’en afo zämeboxe. Aber dä Bueb heb’si gwehrt und zruggboxt. Äs syg sehr ulkig gsi, wie do dr Pfarrer als grosse Ma vo obe abe und dr chly Bueb vo unge ufe enanger töfflet hebe.

​Item, dr Bueb heb dr Chürzer zoge. Bereits am Bode gläge heb’er o no dr Schueh vom Pfarrer schmärzvoll lehre kenne. Dr Pfarrer heb’en denn zur Tür usespediert. Dä heb si aber nit so schnäll gschlage gäh. Är heb drno vo dusse zum Fänschter yne grinst und wieder frächi Grymasse und Faxe gschnitte. Vo dört a heb ihn dr Pfarrer vom Religionsunterricht usgschlosse und är heb vo dört a nimmi dörfe Altardiener si!

---