17. April 2024

​





S’Alter…


Jä, s Alter chunnt nit über Nacht.
Nei, s schliecht sich ganz heimlich, lies und sacht
zerscht no mit Abschtand hindedri,
doch langsam, langsam holts eim i.
Denn stohts uff eimol näbedra
und git gar gli s Kommando a.
Als erschts lohts eim, fascht wie versässe,
Usdrück und Näme vergässe.
Und ohni z froge, öb mes well
Druggts eim is Gsicht e Brüllegschtell
Und Zähn is Mul,wo chasch betrachte,
wenn sie im Zahnglass übernachte.
Jä, s Alter lot di denn nümm lo goh
Das gschpürsch und gsesch ganz guet, he jo.
Wills so chlini Zeiche git
Wo de finde chasch uff Schritt und Tritt.
Im Zug oder im Auto vo dr Poscht
Passierts ganz unverhofft bigoscht,
s treit dir e junge flotte Ma
charmant galant si Sitzplatz a.
Dernäbe,do chasch Gift druf neh
Chasch uff dr Schtross kei Ma me gseh,
wo uffem Absatz ummeschwänkt
und wäge dir si Hals verränkt.
Und keine luegt me wie unter Zwang,
in dini Auge tief und lang.
Doch eine gits, wos do nit harzt,
das isch grad no di Augenarzt.

---